![[Lancha_Mazarico_Restaurada_Manuel_Lestón.jpg]](https://blogger.googleusercontent.com/img/b/R29vZ2xl/AVvXsEj9bF7ykVIfdeQbDZ_IK5n9AQwJfO1qAfNtPNLJi6ywhfE3yfWCoeR0zkXoO5Dcg07SKm9R9vIruvGJwbBSLtzivGYtqOGZz8_S0dilQcJt7jeF_Vkeo57IveKoEircg1n41oMw7I4UYLE/s640/Lancha_Mazarico_Restaurada_Manuel_Lest%C3%B3n.jpg)
(http://singraduradarelinga.blogspot.com/2006/12/)
Esa lanchiña do xeito
ía polo mar abaixo:
roubáralle o vento a vela,
e a vela arrincoulle o mastro
onde o mar quixo escondela.
-Coitada lancha do xeito,
miña lanchiña gaiteira,
canto cobizas a túa ribeira!
Esa lanchiña do xeito,
de nobre carballo feita
por destra man carpinteira,
amañeceu, quilla ao pairo,
entre Vilano e Fisterra.
-Coitada lancha do xeito,
miña lanchiña gaiteira,
canto cobizas a túa ribeira!
Ía polo mar abaixo:
Falta a xente da cuberta…,
nin na tilla…, nin no rancho…,
e o mar non deu razón dela!
Cómpre acreditar no tempo..!
-Coitada lancha do xeito,
miña lanchiña gaiteira,
canto cobizas a túa ribeira!
Cando o mastro vexa o día
e pregunte pola terra,
eu penso que ha reclamarlle
o seu tributo á marea,
e o mar, como sempre fixo...,
purgará a súa conciencia.
-Coitada lancha do xeito,
miña lanchiña gaiteira,
canto cobizas a túa ribeira..!
Coa tripulación, o mastro, e a vela!
(Rioderradeiro, Vigo, 23/06/05)
