Memoria dun luscofusco,
Era segrel de secaño;
Dun arco de medio punto,
Apreixouno o calendario
Nas follas do prontuario.
Apredeu dun arte culto
A monodiar “canto llano”;
Co celo dun arcediano,
Tiroulle ao salterio o gusto
De afacerse ao gregoriano.
Esmolas para o bandullo,
Con degoiro de goliardo,
Para recadar peculio,
Latricaba un espartano
Beberaxe de esconxuros.
-Recanto do medio duro-
Traza o crego un signo mago,
Tremelique o ente escuro,
Peche a boca o mal falado,
Purifica o corpo impuro.
O diaño, por teimudo,
Paga o latín ao contado,
Fai mudanza de prestado…
E pasa a conta ao seguro.
(Rioderradeiro)
