Amortallando a luz dunha quimera.

  A tormenta de nubes xa quebranta,

a envoltura do tempo xa atormenta,

a  chuvia fai do vento ferramenta

a enfarelar a terra cando avanta.

  A fasquía da tarde, terca, aguanta,

tatexa e porfiante representa

desventurada luz sen vestimenta

que o mar maior deglute por garganta.

  Non hai repetición senón ocaso,

non hai perdón de graza nin retraso

do día que esgazou da grande esfera;

  Se a branca nube se tornou severa,

será porque o solpor firmou fracaso

amortallando a luz dunha quimera;

  Estertores de inverno en primavera.

                                (Rioderradeiro)