sexta-feira, 9 de dezembro de 2011

De "atrezzo", teatral pola (im)postura.



Envilecer amor é ben doado,
É competir co azar á pitacega,
É corromper a fe fronte á refrega
Con  fume dun fogón mal apagado.

Envilecer amor, campo sagrado,
É coma escarnecer seitura en sega,
É segregar máis dor que se reprega
En ferida interior con desangrado.

Envilecer amor é desmesura,
Escarnio, vilipendio, e desventura
Que infesta, fanfarrón, tea de araña;

Envilecer amor é máis maraña
A confundir fracaso con fractura
Dun corazón tamaño en mala entraña,

De "atrezzo", teatral pola (im)postura.

(Rioderradeiro)