Veneran no granito o puro carto?

  
  Poñamos que este sol vai de cruceiro

e toda vaguidade desvirtúa;

poñamos que lle prende lume á lúa

Ícaro voador cun candeeiro.

  Convén saber se a fe do carboeiro

consiste en lle prestar alas ao vento,

se claramente a fe propaga evento

no tobogán das nubes cun plumeiro.

  Convén saber se reptan, coma a hedra,

rato, gato montés, lesma, o lagarto…,

se, en puridade, trepa por reparto

a cobiza da fauna cando medra.

  Quen vindica ao divino en Cruz de Pedra?

Poñamos que, piadoso, non descarto:
Veneran no granito o puro carto?

       (Rioderradeiro)