O vendaval perpetra en cen costados.

                          (Foto: Benirroxo)

  Coma víbora vil, veleidosa e perversa,

adianta, amosa o vento a catadura;

avanza o vendaval, e brinca, e brúa,

e rompe corazón á primavera.

  O vendaval tén présa e non relea,

o vendaval proclama a mala uva,

o vendaval propende á mordedura,

o vendaval posúe a chave arteira...

  De desatar en tromba un pulo airado,

por incendiar en nós mal pensamento,

desencadea Eolo alento aciago;

  Pavoroso empurrar polo tormento,

esnaquiza sen dó; o mar, por dentro,

dá estocadas triunfais cos seus tornados:

  O vendaval perpetra en cen costados.

          (Rioderradeiro)