Veneran no granito o puro carto?

  
  Poñamos que este sol vai de cruceiro

e toda vaguidade desvirtúa;

poñamos que lle prende lume á lúa

Ícaro voador cun candeeiro.

  Convén saber se a fe do carboeiro

consiste en lle prestar alas ao vento,

se claramente a fe propaga evento

no tobogán das nubes cun plumeiro.

  Convén saber se reptan, coma a hedra,

rato, gato montés, lesma, o lagarto…,

se, en puridade, trepa por reparto

a cobiza da fauna cando medra.

  Quen vindica ao divino en Cruz de Pedra?

Poñamos que, piadoso, non descarto:
Veneran no granito o puro carto?

       (Rioderradeiro)

O tempo apura, opera a morte a mente.

(Wikipedia)

  Ladran mil cans, este fantasma existe

e arrepía a memoria recordalo;

o xinete de sombras se reviste,

desboca no teu peito o seu cabalo.

  Miañan mil gatos; o temor consiste

en dislocar por dentro o tarabelo;

atácalle de noite ao neno triste

empuñando puñais de terciopelo.

  Ladran mil cans; o medo adolescente,

de escuro, a cabalgar por subconsciente

por ser rapaz doente sen sabelo.

  Miañan mil gatos; coma un escalpelo,

o tempo apura, opera a morte a mente

e salpica de canas barba e pelo.

   (Rioderradeiro)

(Sigismund Shlomo Freud, Wikipedia)

Para esculpir na aperta que te quero.

( Wikipedia.- Admiración maternal, obra de William Bouguereau, s. XIX.)

  Perdurará no tempo a túa imaxe

mentres de NAI se vista a primavera;

se o pulso do meu pranto persevera,

ha penetrar a terra do teu traxe?

  A perforar a pedra da blindaxe,

puro debate contra unha quimera,

vou  abreviando, sen compás de espera,

os pasos a pagar pola peaxe.

  Non sei como dicilo en verbo austero,

con que lume nos ollos deslumbrarte,

con que rito sagrado despertarte

do sono irreversible máis severo.

  Son neno na vellez, quero abrazarte

para esculpir na aperta que te quero.

  (Rioderradeiro)

Sen gaita daquel gaiteiro.

(Wikipedia, Helena de Troia)

  

  Entre xasmín e azucena,
o semblante xuvenil,

delicioso o teu perfil

e mareante a melena,

doce mirada serena,

debruzante peitoril,

metáfora de marfil,

pintado pico en patena;
estampa ben pastoril,

doncela de aliño, Helena...

  Pula a pluma no plumeiro,

verte verso na rapsodia;

retira rodicio a roda;

lisca troula do trouleiro;

retorna tinta ao tinteiro...

  Ficou reseca a prosodia

do compromiso primeiro,

do peiteado sen poda,

sen "verbigracia" de voda,
sen gaita daquel gaiteiro...

  For paxaro carpinteiro
de cabeza, cima e coda,
acróbata, verdadeiro
salimbanqui da parodia..!

    (Rioderradeiro)

(Wikipedia, Helana de Troia)

A España que te nega a cada instante.

 (Wikipedia; Toro de Osborne cercano a Las Cabezas de San Juan, Sevilla)

  A España que desprega malandanza,

a golpe de esperpento, adoecida;

a España de calvario e de corrida,

de carnaval, de pleito e de pitanza.

  A España da ruleta e da folganza,

embozada de historia, enfebrecida;

a España tan cristiá, tan fratricida,

mausoleo e pendón sen esperanza.

  A España que perpetra e debilita

con tizona de Cid recalcitrante;

a España de secaño, intolerante,

fociño a debruzar por Pedrafita;

  A España que te agrede e que te grita,

ouropel imperial, sempre arrogante;

  A España que te invade a cada instante

non pode convencer; porque te irrita.

  (Rioderradeiro)