goza o teu soño indixesto..!

  A razón de non querer

pasar pola túa porta

só me atixe e non che importa

se a prefiro padecer.

  Pois son quen de apetecer

namoramento sufrido,

linda causa é, reprimido,

privarlle á sede beber.

  Brindes ao sol, sendo honesto,

escribín no manifesto

que tire a mesa o mantel,

  Que lisque a lúa o seu mel

ben na gaiola, ou nun cesto,

no faiado poñer presto;

  Xa apostrofei no papel:

-Malpocado Caravel,

goza o teu soño indixesto..!

                         (Riderradeiro)

Ti triunfarás, linda estrela

  Onde estás ti todo é festa:

Quixo Deus, que ama a valía

e a malgastar non se apresta,

multiplicarche alegría.

  Quizá, por fin, risa honesta,

en vendo a túa harmonía

como de fada en floresta,

floreza en min algún día.

  Se cadra porque babexo

cos ollos con que te vexo,

non podo verte máis bela;

  Son o máis fiel centinela

para afastares perigo,

e sempre da man, testigo,

Ti triunfarás, linda estrela,

e o meu corazón…, contigo.

(Rioderradeiro)

De Adán, no Edén, cociñeiro.

Sestea o serán no azul,
Mais, como remata todo,
Traspasa a espada ese apodo,
Corpo servido..., e gandul.

Andan dicindo, papá,

Polos rueiros contando

Que o demo vai propagando

Conversación con mamá

Cando o limón foi, pecando,

Reconvertido en mazá. 

Prospecto do limoeiro

Pendurado dun cordón,

Noutra póla, retranqueiro,

Triplica interpretación

E reforza a confesión

Do cítrico verdadeiro

Que folla, por tentadeiro,

Como de/mostra o botón,

Preso en trama o tropezón

Compracente aventureiro

Ver/decente en corazón,
Orixina pracenteiro

Un pecado vinculeiro:

Puxou fervente o limón

Na maceira en conversión

De Adán, no Edén, cociñeiro.

Chouta Adela e chanta Aimar,

Tamén chouta Micaela,
Coma o limón que ao chantar,

Chouta no leito unha estrela,

Micidade a rebuldar:

¡Árdelle o eixo! ¡Can/dela…!





Sestea o serán no azul,
Mais, como remata todo,
Traspasa a espada ese apodo,
Corpo servido..., e gandul.

(Rioderradeiro)

No corazón vellouqueiro.

Beber a sede encirraba

Á fonte que repetía

Máis lume en piromanía

Do que o namoro enxergaba.

Beber a sede entrañaba,

Abeberando sequía,

Ter sedenta teimosía

De combustión que entregaba.

Desta maneira adiviño

Como has conformar, mociño,

Rebuldeiro en alborada,

Fermento en fogo artilleiro,

Tecida gula en lumeiro

Boca a boca en labarada,

Bebendo sede implantada

En corazón vellouqueiro.

(Riderradeiro)

MUROS leal, sen cancelos,

  Pensouno en Valdexería,

consultou con MonteLouro;

para investir tal tesouro,

levantou MUROS na ría.

  Quen puxo a pedra non quixo

no corazón pór muralla,

só resumir na medalla

dos muradáns canto fixo:

  Rúas de nomes pomposos

en rueiros portentosos 
na humanitaria; primores!

  Canta Oroso e Cruz de Pelos,

canta Baño e Miraflores,

campo de Cortes…, cantores!:

  Nobre, leal, sen cancelos,

MUROS triunfal, sen castelos!

                               (Rioderradeiro)