Da parca, o Vendaval fai bandeiría.

  Don Vendaval cabalga en descampado

incorrupta paixón, coito interrupto,

cabaleiro voraz polo exabrupto

a cabalo do vento vén montado.

  Don Vendaval galopa aqueloutrado,

disoluto de seu, dono absoluto,

cabaleiro ladrón, feudal tributo

multiplica por mil; cobra ao contado.

  Baixo sombra abismal que infecta espera,

o balandro envaiñado na badía

agoniza en mallante da marea;

  Contributo ancestral á primavera,

o raio transparente en marusía

pinta enloitada parca sobre area:

  Da parca, o Vendaval fai bandeiría.

          
           (Rioderradeiro)

- Todos no meu baixel…, proa á lembranza!

  Ai da pena ancestral que me repasa

e que me abre en canal e rompe en río!,

ai da empedrada dor do meu baldío

baleirando caudal que me rebasa!

  Ai, linda pedra lar, e berce..., e casa,

cordón umbilical e largacío!;

ai da mente en alerta a, decotío,

degraer, denudar alma na brasa..!

  Atávico sentir, culto de ausencia, 
proído en corazón, bela apetencia,
ai caracol!, perseguindo esperanza...

  Por capital, timón, mastro..., e mudanza,

reverdecente fe, brava impaciencia:

todos no meu baixel…, proa á lembranza!

         (Rioderradeiro)

Feneces, corazón, porque te encovas.

  

  Abur, meu corazón; pasas de esguello

pola peneira azul que te acubilla.

Adeus, miña razón, nave sen quilla

a mercé dun vaivén bravo no espello.                                      

                                        

  Abur, meu corazón, cinza en nobelo

coma ronsel do sol cando ensarilla.

Adeus, miña razón, luz que partilla

unha acendrada estirpe de escalpelo.

  Adeus das ilusións, brisas perdidas;

o gran pintor só pintou para alcobas

do velame do aquén velas cumpridas.

  Abur, miña razón, polas feridas

do ritual solar non te renovas:

feneces, corazón, porque te encovas...

  Por xermolar, talvez, en novas vidas.

(Rioderradeiro)

- E ceba, na espingarda, outra pirueta.

  Imponderable en ripios, o poema,
por fermentar nas tripas, amontoa

sen consultar co vento que a coroa

da inspiración insoportable aprema.

  Insobornable insuflador da flema,

procura ese oco de enquistar a loa

na inefable bocana onde empadroa

a voz irrefrenable do enfisema.

  Contas do capitán, por simpatía,

depón o noso bate dous cuartetos

á brava -anda sobrado de enerxía-;

  Respira, espadachín, preme espoleta

e perpetra, a florete, os dous tercetos

no SONETO floral da poesía…

  E ceba, na espingarda, outra pirueta.

                 (Rioderradeiro)

CARTUCHO anxelical que se inflamara.

  
  Albura sen igual, inmaculada,

loces carne mortal, ouro en patena,

a flama que se inflama e se refrena

no cáliz da paixón engaiolada.

  Albergas na prisión tan resignada,

o mastro ergueito, a brisa burla antena;

reflictes na brancura a faz da pena

da verga en vertical desenvaiñada.

  Como lle has apagar tanta quentura

se bebes sede ardente da secura?

Cobizas consumar a cruz ou cara,

pretendes perpetrar envergadura...

  Involucrando LIRIO en desventura.
Endexamais tal fame se fartara:

  CARTUCHO anxelical que se inflamara.

          (Rioderradeiro)