A preguntar por min constantemente.

  Esta vida é capítulo imperfecto;

pódela resumir en case nada.

Que é a morte? Unha falta de respecto;

entra sen avisar, sen ser chamada.

  Víate invulnerable, ou parecías,

e, sen embargo, foches vulnerado.

Críaste dura rocha. Fantasías

de heroe, en fin, nun corpo de prestado.

  Non me esquezo de ti. Estás presente,

espírito inmortal, na miña mente.

Non ignoro quen son,  nin que soporto

pesadelos de ausencia. Vivo absorto…

  sumando señardades. Tanta xente,

na badía do alén, nesoutro porto,

a preguntar por min constantemente.

  
     (Rioderradeiro)

Recollerás, se cadra, outra semente.

(Wikipedia, Ruth Matilda Andersosn)

  Ergue axiña, labrego, o tempo apura;

agárdate impaciente outra xornada,

bois, vacas, carro, arado…, e maila aixada,

emparentados pola agricultura.

  Emparentados pola agricultura,

o prado, a leira, aquel millo barbeito;

caudal de rega sobre o campo, afeito

a redimir a terra da secura.

  A devoción da xente, que se amosa

reverente e vital; a rogativa;

o santo milagreiro que se activa;

a boroa, na mesa, saborosa...

  Sementa aí, labrego, o soño en quente;

recollerás, se cadra, outra semente.

     (Rioderradeiro)


(El País)

Que audacia máis baril para cantala!?

    (Wikipedia, Francisco de Goya)

  Seguen sombra da senda, en solitario,

trastos: capote, estoque…, ese arrepío;

fora a praza xardín e mais xentío,

e lida, e purgatorio…, o teu calvario.

  Aquel botón de rosa por ferida

é manancial fervente da fisura;

triste albeiro; na area, esa escritura

proba documental, alí caída.

  Dan veredicto. A festa, de repente,

falou coa traxedia. Eras valente.

Bebeches toda a morte ao provocala.

   Brindaras, coa monteira, ao presidente

a vida de toureiro en alcabala.

Que casta tan viril, tan obediente!

  Que audacia máis baril para cantala!?

      
      (Rioderradeiro)

Un ego corrompido que serpea.

(Wikipedia)

  Desde neno, sen dúbida, incorporas

privilexios de ser acomodado,

xoguete de destino, acostumado

a meterte no espello a todas horas.

  Adolescente, infante inveterado,

por nacido nun berce exclusivista,

por descaro, por alma narcisista

propietaria dun corpo de pecado.

  É tempo de eleccións. Veña, tourea!

Estás proposto coma candidato;

o teu perfil, repique en arrebato

do músculo viril. Verga!, tolea…

  a espada pueril. Entre en debate

a Galiza servil da panacea;

a causa de compor máis melopea,

Narciso, patrocina o disparate.

  Por Deus, ha reflectir o xaquemate
ese ego corrompido que o retrate?


   (Rioderradeiro)



(Wikipedia)

No teu colo outra vez. Sinto morriña.

  Triste… Alegre… Francas velas ao vento.

Alerta, capitán, que zarpa o teu navío.

Ataca temporal. Campa o bravío.

Encirra vendaval de barlovento.

  Triste… Alegre… Cambiante o movemento.

Imaxes: debruzando en mar o río,

o tempo derramando no baldío,

a vida debagando o seu talento.

  Alegre… Triste… Infancia que foi miña.

A pedra lar. A man que me acariña.

Abrazos paternais e protectores.

  Abeiro familiar. Seráns. Solpores.

Bálsamo, por favor, para esta espiña;

penso nos bicos, nai; sempre os mellores.

  No teu colo outra vez. Sinto morriña.

    
       (Rioderradeiro)