Acosa o sol xogando esta partida.

  Acosa o sol, pon linda a cara triste

e demuda a tristura en algazara.

Acaso a man do sol ben recadara

na caricia que prende en quen resiste.

  Acosa o sol, no resplandor consiste

revelar luz que o divino inventara.

Acaso a luz do sol simbolizara

a inmanencia de Deus en canto existe.

  De ocaso o sol, acaso  deita acedo,

acochado no mar, pernocta ledo,

dá a batalla carnal dun deicida,

  Persegue a salvación pola amencida

e, volto a se encimar, a porte inquedo:

Acosa o sol xogando esta partida.

(Rioderradeiro)

"A dignidade" é pau con longaniza.

  A dignidade en ti, antro que indigna,

lixo que desterrou toda brancura,

a páxina salaz e a sinatura

pactadas a compás que contamina.

  A dignidade en ti, que peregrina

e acomete e devora o pan da usura,

recanto natural e sepultura:

a indignidade entoba a túa inquina.

  A dignidade en ti, pura patraña,

é pía compaixón de falsa entraña;

as razóns de roubar de quen cobiza...

  Fan de funil, por lei, dunha alcabala;

na báscula, Mercurio pesa e cala:

promove indignidade na inxustiza.


  "A dignidade" é pau con longaniza.

(Rioderradeiro)

Endereitar as frechas de Cupido.

Ha de acadar no pan nova amencida,

Debe arrincar o gran da sementeira,

Ha de encadrar na malla á muiñeira,

Desenfadar a fada confundida.

Ha de afogar de sede á fame espida,

Debe alagar de brillo esa roseira,

Ha de arroupar de armiño a cabeleira,

Recompensar a man empobrecida.

Corazón de cartón, cabalo ergueito,

Por misterioso azar tan mal prendido,

Sustancia do inmortal incomprendido,

Galopa a discreción polo teu peito;

Alcanza, corazón, forza o dereito

De endereitar as frechas de Cupido.

(Rioderradeiro)

Polas sombras do ser, coma unha araña

  

  Queres poñer o mar a bon cuberto,

recollelo en canal pola xanela,

deixalo repousar, pór centinela,

furtarlle o aldabrón ao mar incerto.

  Queres coller do pulso o mar aberto,

cinguilo de adival pola cintura;

na lareira, veleiro en grande altura,

soña a derrota o navegante experto.

  Estranxeiro de ti, quen te interroga?;

encrequenado en ti, quen te acompaña?;

escravizado a ti, quen te encadea?

  Ha responder na vaga o remo en voga

polas sombras do ser, coma unha araña

na arañeira do mar, na túa tea.

(Rioderradeiro)

No reiseñor, na rosa..., no regueiro.

  Sementa Deus a graza que te ampara:

no corazón de Deus reina a empatía.

Na coraza pon Deus cabalería:

regala Deus contino ardor sen tara.

  Sabe, por vello, Deus... Quen apreixara

a sapiencia de Deus, sabiduría!

A cordura de Deus... Por cortesía,

ponlle ao mal tempo Deus moi boa cara!

  Se nos falase Deus directamente,

humanizando a voz coma voceiro,

sería o ton de Deus máis verdadeiro

  Cá palabra de Deus, tan convincente,

no corazón da flor? Sinceramente...

Silencio!, fala Deus, de corpo enteiro,

  No reiseñor, na rosa..., no regueiro.

(Rioderradeiro)