(Foto de Reyes Benoit)
Hai rosas de silabario
nas camposas e silveiras;
hainas de moitas maneiras,
sen dono, sen usuario...
Hainas de xardín, á beira
de arrogante faldriqueira;
hainas de papel pintado,
estampadas nun murado;
hainas, profesando angueira,
a carón dunha cadeira,
embigo de relicario,
en aras dun ventre oufano.
Pero a rosa que máis amo,
a que a min máis me desvela,
ten de rosa verdadeira
que non se compra ao contado,
que non renuncia á roseira,
que te apreixa e te embebeda,
feiticeira, co seu halo;
primor de espiña..., o regalo.
(Rioderradeiro)
(Foto de Reyes Benoit)
