Coa tizona en plan Cid

Peóns de sombra e perfil,
raíña, cabalo, alfil,
torres..., xogadas por mil,

debate un amigo en serio

se en Cataluña hai misterio,

se en Vasconia hai cativerio,

se en Galicia un infeliz

consinte á forza motriz,

do circuíto á cerviz,

multiplicarse en amperio.

¡Adeus a España doImperio..!,

por permitir improperio,

grande e libre cicatriz

exposta ao sol en salterio,

pois tapando o seu nariz

con contubernio ou tamiz,
con uniforme sumerio,

coa tizona do Cid,
xaque mate: O Rei David

uniforma o cemiterio.

(Rioderradeiro)

e guarnición de marisco

 "As ghambas están sin cabeza. Non pensedes que teño nada contra elas..." ( Quin Muros Negreira)

Non corre arroz ningún risco

en procurar complemento

de azafrán e de pemento

e guarnición de marisco

de obrigado cumprimento;

como é perfecta, confisco

cazarola do festín;

bo cociñeiro, por fin

borrado aquel xenio arisco

da lámpada de Aladín,

rexistrara, en Muros, Quin

esta paella no disco,
e anda a soar o mordisco,

a pé de páxina, en min.

 (Rioderradeiro)

por mil anos no salseiro

A cabeza do pescador (e para máis a do pescador de cana) é un Longarela, un rodicio de soños, un contumaz laboratorio de ideas revoltas, un encoro (ás veces, poucas veces, un encoro!), unha fervenza de desexos irrealizables, de penas atrasadas, de amores perdidos, unha avenida de ilusións, coma un río caótico, desbocado, camiño da inmensidade do Mar, onde alguén, algo.., unha realidade inédita, outra clase de vida. está, alí, á nosa espera. Cousa linda é soñar, entre angurias e contradicións, ignorando as miserias.

  Por se impoñer ao rapaz,

que pescaba no peirao

do Gran Sol ao bacallao,

exerceu de capataz.

  Por cumprir coa encomenda,

probo axente do naval

recibiu como adival

incomprensión por prebenda.

  Por colgar do taboleiro

un reproche xusticieiro

contraditorio coa lei…,

  por irrespecto a quen sei,

coma se fose de aceiro

servir na dársena ao Rei…,

  por ter paz, porque atopei

veleno en tinta e plumeiro

de quen disparou primeiro…,

  por malmeter o peteiro

peixe na brinca, empurrei:
protesto, e protestarei...

  por mil anos no salseiro
que por un pelo apalpei.

   (Rioderradeiro)

sen cebola e sen refrán

¡Ai, que peniña me dan!,

inocentes criaturas

-aire…, namoro…, ¿que fan?-,

Petri que morre por Xan

e Xan, rozando as alturas,

elevando as escrituras

de poste a poste inseguras

da proclama en celofán;

mingua a fe para un cristián,

revolto o día, ás escuras

este cartaz sen fisuras

cara ao vento pillabán

rebentador das costuras,

se afrontan paro sen pan,

sen cebola e sen refrán

que levar ás dentaduras.

   (Rioderradeiro)

EVA en costela de JARO,

 Meteulle o dente a muller

á mazá do paraíso

e recuncou de improviso,

tan forte fora o pracer…,

con Adán, que, ao parecer,

renovando o seu permiso,

inda vivía no piso

sen pagar un aluguer.

Casados polo civil,

e co banco hipotecario,

firmaron un formulario

do código mercantil…

-cabaceira de perfil-

EVA en costela de JARO,

porque o pescado está caro,

fóra de prezo o pernil.

  (Rioderradeiro)