A carga que máis me pesa

A carga que máis me pesa

implica o propio existir:

sacar de quicio o vivir

desangrado a toda présa,

botarlle un pulso á cabeza

do berce ata a sepultura,

caer de froita madura

onde denuda incerteza.

Dura pracer só un minuto,

o padecer persevera,

se outra esperanza me espera…,

se hei descargar noutra esfera

este existir disoluto,

pola escalada debuto…,

pois desvivir desespera.

(Rioderradeiro)

Son de Carnota as leiteiras.

    (1924, Ruth Matilda Arderson)

  Conto por toucas. Son cinco,

ben enfiladas, na estrada,

como encofrando mirada

para encarrilar o brinco.

  Son de Carnota as leiteiras;

á vila, abrindo a mañán,

con caldeiretas na man

chegan, de cote, as primeiras.

  En Muros venden patacas,

ovos, allos e cebolas

no mercado e polas rúas;

  se, por desprezo, as atacas,

non por iso as descontrolas

nin tampouco as desvirtúas;

  pola contra, inda acentúas

bautizo ao leite das vacas.

         (Rioderradeiro)

     (Ruth Matilda Arderson))

Doutro fracaso á medida.

 (Tulouse-Lautrec)

  Atemperada en tal caso

surtira efecto cicuta,

sen reparar na minuta,

dera de présa un mal paso.

  Fincara o corpo teimudo

nos dentes dunha mordaza,

tornara o gozo en desgraza,

o leito quedará mudo…

  Non manda a meta no abrazo

nin mide a mente o seu trazo

por repetir a partida;

  segue candente a mordida

que reproduce embarazo

doutro fracaso á medida.

(Rioderradeiro)



(Toulouse-Lautrec)

Chávez luceiro en razón.

Poño nesta face o nome
e co meu nome quen son
-un entre tantos-, xa estou
vinculado ao home
e, se el partise, eu vou
onde, por amor, se asome
Chávez luceiro en razón.

(Rioderradeiro)

Chávez, valor permanente (in memoriam)

En vida non se abrandaba

este valente soldado

pola parca arrebatado

cando más firme avantaba.

Soldado -insisto-, cimeiro,

un león contra mil feras,

cordeiro polas maneiras

do seu perfil misioneiro.

Exemplo de cabaleiro,

amigo que bravamente

te reforza e te concerta;

o corazón por abeiro,

paradigma sobranceiro,

posta a palabra en aperta;

Hugo, profundo e potente,

Chávez, valor permanente

Da causa que segue aberta.

  

(Rioderradeiro)