Só na memoria implantada.

                "Le dur désir de durer..." (Paul Éluard)

  Bela advocación de artista,

presa da poliña, aberta,

febre á mirada, desperta,

admirable reconquista.

  Raíña en verde, imprevista,

por natureza inconcreta,

de fermosura indiscreta,

luxuriante para a vista.

  Ai!, rosa que vertes todo

polo chan, sen acomodo,

desprendida e desdeñada,

  Só na memoria implantada,

murcha da choiva e do vento

como a pel do sufrimento,

  Ai!, rosa, desventurada, 
na flor da vida un momento...

(Rioderradeiro)

Repasando a propia historia.

 “On ne philosophe pas pour passer le temps, ni pour faire joujou avec
 les concepts: on philosophe pour sauver sa peau et son âme.”
 ( André Comte-Spoville: “L´amour la solitude”)

Sentir que a pena te esgana

É furgar pola memoria,

Verquer remorsos na noria,

Cazalos con cerbatana

Repasando a propia historia.

(Rioderradeiro)

http://diariosdeunabicicleta.blogspot.es/

Noutra terra o teu cantar.

_________________

Sendo Galiza o fogar,

Ignoras o que é soñar

Porque soñando xa vives;

Despertas cando concibes

Noutra terra o teu cantar.

(Rioderradeiro)

Abraza en vela a badía.

  Navega sen lei nin vento

embozado en valentía,

abraza en vela a badía

e deixa o mar sen alento

encalmada a marusía.

             

  Nos soportais brega agora,

axita en mans valemento,

desborda en barba argumento

curricán do mar de fóra

Recalcando o pensamento.

  Embozado en valentía,

abraza en vela a badía.


  Navega sen lei nin vento
e deixa o mar sen alento...

        (Rioderradeiro)

Concelleiros de cartón.

Tiñamos representantes,

Tridente en Corporación,

Colados coma cordón

Polo calzado campantes,

Prófugos pola intención,

Póstumos determinantes

Dun sintagma de salón

Que agora creo que son,

Sen siglas relacionantes,

Tres vasos concomitantes

Cambistas de condición,

Rentistas reconfortantes,

Trobeiros recalcitrantes

Concelleiros de cartón.

(Rioderradeiro)