AMOR IMPOSIBLE

AMOR IMPOSIBLE
__________________


Os soños, o Fungarelo,
Sempre a tecelos,
¡Sempre a tecelos!


Polo val, pola ribeira,
Vai Fungarela;
Os soños de Fungarelo
Foxen con ela.

¡Ai, Fungarela!
¡Ai, Fungarelo!


Os soños, ¡volta a tecelos
Con mil novelos!

NO TOBOGÁN DA MORTE

NO TOBOGÁN DA MORTE
_______________________



Vou con paso apurado;
O tempo empuxa forte.
Non son quen de frealo
No tobogán da morte.

No corredor da morte
Non son quen de frealo.
O tempo empuxa forte;
Vou con paso apurado.


Vou con paso apurado;
Non son quen de frealo.
O tempo empuxa forte
No tribunal da morte.


Non son quen de paralo;
Vou con paso apurado...
¡Vou con paso apurado
No tobogán da morte..!


¡O tempo empuxa forte!;
¡Non son quen de frealo..!

¡No corredor da morte
o tempo empuxa forte!

MAREA NEGRA

Pedra de Espiño ten lenda

e o Neixón debe aprendela.

Dicta o Carreiro o poema

onde acubillan as penas...


Da Insua á Escorachela,

¡cantarela..!,

¡cantarela..!


Por toda a Costa da Morte,

do “Prestige”,

¡chapapote..!,

¡chapapote..!

AQUEL NENO

  O vento lene

lévame pola braña.

Son aquel neno ceibe

que me acompaña.



  Meniño, vou no soño

xogando á guerra;

xa matei tres lagartos

e unha culebra.


  No fondo da memoria

a braña é meiga;

o meigallo relouca

por toda ela.




  Cando veñan os indios

coas espingardas,

loita a morte!, a por eles!,

como Deus manda.


  Son aquel neno ceibe;

vou pola braña;

xogo á guerra no soño...

A batalla hei gañala..!


  (Rioderradeiro)

POBRE GAMELA!

  A gamela do cura
xa non ten vela,
que lla lambeu a criada
para vendela.

  Abade sen terapia...,
pobre gamela!



  No mallante da costa...,
dá pena vela;
quen a deixe ao seu pairo
pode perdela.

  Gamela no mallante...,
pobre gamela!



  Pillabán crego ceibo,
desvergoñado,
prófugo da pobreza,
ou dun arado.

  Crego desvencellado...,
pobre gamela!


  (Rioderradeiro)